Scoileanna Oiliúna an ATÓÉ
An Scoil Cumarsáide agus Seirbhísí Faisnéise
Reáchtálann an Scoil Cumarsáide agus Seirbhísí Faisnéise cúrsaí a bhaineann le ról agus úsáid trealamh cumarsáide, lena n-áirítear slándáil cumarsáide agus cothabháil, le haghaidh gach céime.
An Scoil Iompair agus Cothabhála Feithiclí
Is é an ról atá ag an Scoil Iompair agus Cothabhála Feithiclí (TVSM) ná na caighdeáin arda tiomána laistigh d’Óglaigh na hÉireann (DF) a chaomhnú. Chuige sin, reáchtálann an scoil cúrsaí éagsúla tiomána i réimse feithiclí chun a chinntiú go bhfuil pearsanra Óglaigh na hÉireann inniúil le feithiclí míleata inneall-ghluaiste a oibriú go sábháilte. Ina theannta sin tá sé mar chúram ar an TVMS traenáil mheicniúil feisteoirí a chomhordú agus a mhaoirsiú, ionas go ndéanfar flít feithiclí Óglaigh na hÉireann a chothabháil ar bhealach éifeachtach agus go héifeachtúil ó thaobh costais.
An Scoil Ordanáis
Soláthraíonn an Scoil Ordanáis teagasc chun riachtanais an Chóir Ordanáis agus Óglaigh na hÉireann a shásamh i réimsí teicniúla a thagann laistigh de réimse freagrachta agus saineolais an Chóir. Déanann sí é sin trí chúrsaí gairme agus cúrsaí eile níos giorra, go hiondúil ar shainréimsí nó ar threalamh aonair, a chur ar fáil. Tá cúrsaí gairme níos faide agus tá siad den riachtanas chun go mbeidh an mac léinn cáilithe chun grád teicniúil ar leith a líonadh. Bíonn cúrsa leantach ag teacht i ndiaidh mhórchuid na gcúrsaí gairme chun go mbeidh deis ag an mac léinn chun tógála ar an eolas, ar na scileanna agus ar an gceannaireacht a d’fhoghlaim sé ón mbunchúrsa.
An Scoil Phóilíní Airm
Soláthraíonn an Scoil Phóilíní Airm teagasc i bpóilíneacht agus in ábhair bhainteacha do phearsanra an Chóir Póilíní Airm. Samplaí de na cúrsaí a reáchtáiltear ná: Cúrsaí Oifigeach sna Póilíní Airm, Cúrsaí Promhóirí sna Póilíní Airm, Cúrsaí ONC ar Chaighdeán Propaist, Cúrsaí Fiosrúcháin, Cúrsaí ar Dhrugaí agus Cúrsaí le haghaidh Griangrafadóirí Póilíní. Reáchtálann siad Cúrsa Póilíní Airm Idirnáisiúnta go hocáideach.
An Scoil Innealtóireachta
Tá fócas na Scoile Innealtóireachta ar innealtóireacht comhraic, ar shoghluaiseacht agus ar oibríochtaí frith-shoghluaiseachta: droicheadaíocht, scartálacha, imréiteach mianach agus bearnú bacainní. Reáchtálann siad traenáil Fhoireann Innealtóirí Cuardaigh Speisialta (ESST) chomh maith. Soláthraíonn siad traenáil i bhfeasacht mianach le haghaidh na gcór ar fad agus go deimhin le haghaidh An Gharda Síochána (ár bhfórsa póilíní sibhialach) agus NGOanna ar leith. Tá cuid de na cúrsaí a reachtáiltear sa Scoil Innealtóireachta oscailte do rannpháirtithe as tíortha eile.
An Scoil Liachta
Reáchtálann an Scoil Liachta traenáil le haghaidh pearsanra liachta sna seirbhísi ar fad. Déantar traenáil le haghaidh Teicneoirí Liachta Éigeandála a chomhordú agus soláthraíonn sí traenáil i leith gnóthaí liachta agus slántachais le haghaidh aonad uile Óglaigh na hÉireann. Sampla de na cúrsaí ná: Cúrsaí ar Gharchabhair Shaothair agus Scileanna Otharchairr.
Scoil Lónadóireachta Óglaigh na hÉireann
Is í Scoil Lónadóireachta Óglaigh na hÉireann (DFSC) an phríomh-institiúid a bhfuil sé de chúram uirthi an lónadóireacht uile agus an traenáil i mbainistíocht lónadóireachta le haghaidh comhaltaí Óglaigh na hÉireann (DF) a chur ar fáil. Tá an scoil i mbun oibre mar ionad traenála Óglaigh na hÉireann ó bunaíodh an tArm Náisiúnta i 1922. Ó shin i leith tugadh teidil dhifriúla uirthi, Scoil Cócaireachta an Airm, Scoil Lónadóireachta an Airm agus an ceann is déanaí, Scoil Lónadóireachta Óglaigh na hÉireann. Cé gur tháinig athruithe ar na hainmneacha le himeacht na haimsire níor athraigh a croí-mhisean; is í fós lár-ionad agus taisceadán na scileanna lónadóireachta agus na traenála i mbainistíocht lónadóireachta in Óglaigh na hÉireann.
