Tá Ceann Foirne Óglaigh na hÉireann, an Leifteanantghinearál Seán Clancy, ceaptha ina
Chathaoirleach ar Choiste Míleata an Aontais Eorpaigh. Tá sé le dul i mbun an chúraim sin i
mí Bealtaine 2025 agus tiocfaidh sé i gcomharbacht ar an gCathaoirleach reatha, an
Ginearál Robert Brieger as Fórsaí Armtha na hOstáire.
Is é Coiste Míleata an Aontais Eorpaigh an comhlacht míleata is airde céim sa Chomhairle. Is iad
a bhíonn ar an gCoiste, na Cinn Foirne Cosanta as gach ceann de na 27 mBallstát. Déanann
buanionadaí míleata an bhallstáit ionadaíocht thar ceann an Chinn Foirne go rialta. Is é an Coiste
an fóram don chomhairliúchán agus don chomhoibriú míleata idir ballstáit an AE i ndáil le cosc
coinbhleachta agus bainistíocht i gcásanna géarchéime. Déanann an Coiste stiúrú ar an
mbeartaíocht mhíleata ar fad faoi chreat an AE, go háirithe an phleanáil agus an cur i bhfeidhm
maidir le misin agus oibríochtaí míleata faoin gComhbheartas Slándála agus Cosanta (CBSC)
agus an acmhainn mhíleata a thabhairt chun cinn. Déantar, bunaithe ar chomhthoil, stiúir mhíleata
a chur ar fáil d'Fhoireann Míleata an Aontais Eorpaigh (FMAE).
Is ról lánaimseartha ar feadh téarma
trí bliana atá i gceist agus ní raibh Cathaoirleach as Éirinn ar an gCoiste go dtí seo. Beidh
preasócáid á eagrú i nDún Chathail Bhrugha, Ráth Maonais ag 2:30 i.n., Déardaoin an 16
Bealtaine 2024 ag a labhróidh an Leifteanantghinearál Clancy faoina cheapadh sa phost
gradamúil seo agus tugtar cuireadh do lucht na meán cumarsáide a theacht. Beidh deis ag
lucht na meán cumarsáide ag an ócáid seo ceisteanna a chur ar an Leifteanantghinearál
Clancy faoin ról nua. Socrófar deiseanna maithe grianghrafadóireachta freisin i rith na
hócáide agus ina diaidh.
Dáta/Am: Déardaoin, an 16 Bealtaine 2024, 2:30 i.n. (ba cheart do lucht na meán
cumarsáide a bheith i láthair faoin 2:00 i.n.).
Áit: Dún Chathail Bhrugha, Ráth Maonais. Is ceart a theacht chuig Príomhgheata Dhún
Chathail Bhrugha via An Bóthar Míleata, Ráth Maonais.
Duine Teagmhála: An Captaein Kevin Kenny, Preasoifig Óglaigh na hÉireann; 087 673 8395.
Más mian leat an deis seo a thapú, deimhnigh le do thoil, faoin 11:00 r.n., Déardaoin an 16
Bealtaine ainm an iriseora a bheidh ag teacht i láthair tríd an eolas sin a sheoladh chuig
press@military.ie. Iarrtar ar gach duine a bheidh ag teacht i láthair creidiúnú cuí agus
dindiúirí aitheantais a bheith acu chun dul isteach sa Dún.
